【多謝支持 加開一場】
喂呀～～ 你地係咪傻㗎？
一晚同我打爆咗個場，係咪想感動死我？
好啦，加一場㗎咋，真係唔會再加，我啲隊員個個要湊仔湊老婆㗎～
想來嘅就快啲登記！先到先得！
（已經登記咗嘅朋友唔洗擔心，大概一個禮拜內會將電子門票Email俾你地，請留意！）
既然大家咁踴躍支持，就喺度同大家分享多小小。
呢單嘢是咁的。
今年因為疫情冇得飛、少咗好多工作，但亦因為咁而有機會做返一啲計劃咗好耐嘅嘢，例如──出第二本書。
同時，亦重拾一啲放低咗好耐嘅嘢，例如──夾Band。
7月出新書嘅時候，本身都想搞新書分享會，諗諗下，不如將兩件事結合？
新書分享會，點解唔可以係音樂會？
買得本書大家都會睇（我估），我冇需要重新講一次書裡面有寫嘅故事，但，可唔可以用另一個方式，更立體地呈現呢個旅程？
於是，我同班兄弟決定搞呢個「新書分享音樂會」。
本來定喺8月。
點知，亦係因為疫情反覆，呢件事一拖再拖，終於定咗11月搞，當然仍然好不安，唔知疫情會唔會突然又反彈。
不過既然決定咗，就見步行步，我地一直都係咁樣走到今日。
上一次搞Show，已經係2014年，呢幾年嚟，隊友們結婚嘅結婚、生仔嘅生仔、我自己又飛來飛去，真係好耐好耐冇試過一齊做一件事。
今次雖然冇上次咁大型，但主題，似乎繼續係講「成長」，經過咗幾年，相信我地對呢個課題又有好多新嘅體會。我唔敢講係最後一次，但，將每一次都當係最後一次嚟做，或者更加可以無怨無悔、破釜沈舟咁去做。
期待見到你！
#或者幫手Share
#免費派飛堅係破釜沈舟㗎
#個場梗係唔會免費
#完全靠現場課金
#好刺激
《我們都是在旅途上長大的》旅行.音樂分享會
日期：11月8日（日）
時間：
下午 16:45
晚上 19:45（爆滿，可排候補）
地點：荔枝角億利工業中心1013室
馬上免費索取門票：
https://forms.gle/o7acZRXADEs8oEzV6
注意事項⚠️
1. 座位非常有限，必須索取門票方能入場，先到先得
2. 現場自由課金支持場租等成本
3. 已取票者請務必出席，如有要事缺席敬請盡早通知我們取消門票
4. 入場人士必須配戴口罩及量度體溫，並保持適當社交距離
查詢：info@shotravel.com
Search